MKHOZI

NgeLesithathu mhlaka 7 kuSewula 2026

Umhlonitjhwa uSiphosezwe Masango nguSopolotiki owaziwako KwaMhlanga neKwaNdebele yoke. Wakhe waba nguSomkhandlu wezeFundo esiFundeni seMpumalanga,waba nguSomkhandlu emNyangweni wezamaSiko,ubuKghwari nokuziThabisa. Ngaphambidlana kwalokho,uDumako ubeMhloli weenkolo kiwo lomBuso weDemokhrasi njengombana anguthitjhera ngokubandulwa.

 UMkhozi umbuze ngamakhetho ezako njengombana alilunga elaziwako le-African National Congress. Ikulumo yakhe uyindlale ngalendlela “Abantu  abakhambe bayokuvowuda basebenzise ilungelo labo lokuvowuda, bavowudele ihlangano yabo abayikhethileko. Uzakukhumbula umgomo we-wehlangano ye-ANC ka-1955 la ikhuluma khona ngokuthi abantu bazakubusa”.

Naliragela phambili iPhondo lithe akutjho bonyana nakuzele iinhlangano ezinengi kangaka zepolotiki eSewula Afrika, lokho sekutjho bonyana abantu balahlekelwe lithemba ku-African National Congress,awa. Bewenza nesibonelo ngeenhlangano zamakhuwa zepolotiki bonyana ziyimbijana khulu,kunezabantu abanzima zona ezinengi.  UDumako uthethe isibonelo senarha yeNgilandi bonyana zimbili iinhlangano zepolotiki yi-Labour Party ne-Conservative Party kwaphela,kanti e-Amerikha nakhona kunjalo ma-Republicans kunye nama-Democrats.

UDumako uveza bonyana eSewula Afrika iinhlangano zamakhuwa zepolotiki zimbili yi-DA kunye ne-FF Plus,bese kubakhona iinhlangano zamakhuwa zomphakathi. Uragele phambili wathi nasiza ebantwini abanzima, kuneenhlangano ezinengi khulu zepolotiki. Njenganje ziyi-609 iinhlangano zepolotiki ezitloliswe ukuvowudelwa ,KwaMhlanga yodwa ziyi-22 iinhlangano zepolotiki ezitloliswe ku-IEC.

Nakayivalako umhlonitjhwa uSiphosezwe Masango uthe ukubakhona kweenhlangano ezinengi zepolotiki esitjhabeni esinzima,kuyinto nje yangabomu yokufuna ukuhlukanisa amandla wabantu abanzima kwezepolotiki. Ngokuya kwaka Dumako koke lokhu kwenzeka ngabomu ngombana kunabantu abaphethe imali abaphehla yoke lento yokusekela iinhlangano zepolotiki ezisakhasako nezingaziwako, njengombana abatjhotjhozeli bakhona abasekela ngeemali bafuna iinhlangano ezingenamlando ekukhululeni abantu abanzima.

////////////////////////////////////////////////////////////////////////////////////////////////////////////////////////