MKHOZI

NgeLesithathu Mhlaka 14 kuSewula 2026

Kwaggafontein: Ngemva komtjhagalo womphakathi wangenyanga ephelileko ukufaka hlangana ihlangano yepolotiki i-Service Delivery Party la batjhagale khona batjhagalela uMaspalati weThembisile ngezinto ezinengi ezifaka phakathi ukutlhogeka kwemisebenzi,amaphandle angenamvumo nezenzelwa njengokutlhogeka kwamanzi.

Kusasa lokhu okusako ihlangano yomphakathi i-March and March ngakuMaspalati weThembisile ibhince yaqeda ngomtjhagalo wayo oyokusuka esiphambanweni esiphakathi kwesithabathaba seentolo iKwagga Mall. Umtjhagalo lo we-March and March utjhinga eThembisile Local Municipality, la ihlangano le iletha iinghonghoyilo zayo manqophana nokuphathwa kuhle kwamaphandle ukudlula umphakathi weThembisile.

Ngokuya kwakaNomzana uHotnot Masimula umtjhotjhozeli we-March and March ngakuMaspalati weThembisile, uthi amaphandle la azigedlile akanyakazi ku du!,noMaspalati weThembisile ubonakala angazitshwenyi ngawo njengombana kwezinye iimFunda zingawafuni nje. Kungaleso sizathu kunomtjhagalo wokuthula we-March and March utjhinga kwaMaspalati we Thembisile ngeLesine kusasa ngomhlaka 15 kuSewula 2026. Kuyavela bonyana isikhathi esibekiweko sokuhlangana yisimbi yetjhumi ekuseni.

Iintolo eziphethwe maphandle ngakuMaspalati weThembisile zisasebenza njengekuthomneni ngaphandle kwaKwaMhlanga la iintolo zamaphandle zivalwe zoke khona, ngaphandle kwalezo zamaSewula Afrika ngokwendabuko. Kubonakala amaphandle avela eenarheni ezifana ne-Phakhistani,Bhangladetjhi,Itopiya,Somaliya anekani khulu njengombana angafuni ukuvala iintolo zawo ngaphakathi kwakaMaspalati lo weThembisile.

“Sibawa umphakathi woke weThembisile usekele lomtjhagalo begodu ubekhona. Njengombana siya eKwagga nje, sibawa beKwagga baphume boke njengombana bona bangekhe basebenzise iinthuthi ngombana siyakibo le kwaMaspalati. Sinethemba bonyana umtjhagalo lo,uyobamkhulu njengombana kukhona neenthuthi ukusuka KwaMhlanga”,kutjho uNomzana Hotnot Masimula umtjhotjhozeli  we-March and March ngaphakathi kweThembisile Local Municipality.

////////////////////////////////////////////////////////////////////////////////////////////////////////////////////////