Mkhozi

NgeLesithathu Mhlaka 21 kuSewula 2026

Ihlangano yabantu esele bakhulile KwaMhlanga ephethe abogogo nabobamkhulu kuvela bonyana yathoma kade ukusukela eminyakeni yabo-2010. Yathoma kancani kancani la abogogo nabobamkhulu bazithabulula khona umzimba ngaphakathi kwamaqabazi wesonto likababa uMashaba naye ongasekho. Kuthe ngomnyaka ka-2012 ihlangano le kwaba yihlangano etloliswe ngokomthetho.

Ilunga lomphakathi elibalwako la njengosiHlalo wokuthoma kuvela igama likababa uKekana, naye selaziyela kiboyisemkhulu.  Ngemva kwaka baba uKekana, esinye sezakhamuzi esaziwako KwaMhlanga ema “B”ubaba uMakopo wajoyina lehlangano la kibo-2017. Nakakhuluma indaba yehlangano le ubaba uMakopo, uthi wakhethwa waba ngusiHlalo ukurhola lehlangano la amalunga wehlangano le bekabalelwa ku-75.

Ukusuka lapho ubaba uMakopo uveza bonyana ukusukela esontweni la bebazithabulula khona umzimba,bazithabululela khona ngaphandle komakhiwo wesonto kwafika isikhathi la bafudukela khona ephakhini yaKwaMhlanga khona ngema “B”. Ephakhinapha kula bebahlanganyela khona, bebazithabulule nomzimba. Kwakhamba isikhathi basephakhini, bathola indawo kwababa uMdluli naye ongasekho khona ngema “B “. Bahlezi kwababa uMdluli iminyaka engaba mithathu ukusuka lapho kula bathola khona indawo etatawini lomqaliso KwaMhlanga (KwaMhlanga Showground) la bazinze khona bekube khathesi.

Njenganje usiHlalo wehlangano le ngumma u-S.E. Mabhena. Simthole ngoMvulo asemhlanganweni wehlangano i-A re Tshwaraneng Batsofe Service Centre ngaphakathi kweholo yaKwaMhlanga Showground, la bekukhulunywa khona ngokwekambiso yehlangano bonyana kufanele balungise njani izinto zabo ngaphakathi kwehlangano le. Umma u-S.E. Mabhena uthi kunengi okuhle, okwenziwa ngilehlangano njengombana umnqopho wayo kukugcina abantu abadala bonyana baphile kuhle ngokuzithabulula umzimba babebahle nemkhumbulweni.

Kuyabonakala bonyana le yihlangano ephethe ihlanganisela yamalunga,kukhona abothitjhere,abahlengikazi nabanye abakhe basebenza imisebenzi ehlukileko nehlelekileko. Nakaragela phambili usiHlalo uthi bekube nje abakazinzi njengombana basafuna indawo ekungeyabo. Njenganje,ihlangano A Re Tshwaraneng Batsofe inzinze laphaya KwaMhlanga Showground,ngethemba lokuthola yabo indawo ngelinye ilanga njengombana basaqale uMaspalati weThembisile nje bonyana abatholele indawo la bazokwakha khona.

Kokugcina sikhulume nompheki esimthole ngekhwitjhini amajadujadu udade uNono Matjhiya.  Udade lo uphekela abogogo nabobamkhulu khona ngaphakathi komakhiwo wetjhewu yaKwaMhlanga. Nasimtholako ubalungisa isidlo sabo sekuseni,nekhwitjhi lakhe esilithole lihlwengekile likhazimula elingahlalwa yipukani.

Njalo ngoMvulo bekubengeLesine abogogo nabobamkhulu bayahlanga badembe iindaba zehlangano le,bazithabulule umzimba. Kazi endabeni le sikhuluma ngabogogo nabobamkhlu abahlala KwaMhlanga inengi labo,njengombana yathonywa KwaMhlanga kuwodi-32 ngaphasi kwakaMaspalati weThembisile. Ngemva komhlangano lo,amalunga wekomidi abonakale anikela ngeenkipa zasimahla,bapha amalunga wehlangano le ebekahlezi phasapha.