Mkhozi

NgoMvulo Mhlaka 19 kuSewula 2026

Waterval: NgeBhosa eWaterval”B”ngaphasi kwakaMaspalati we-Dr. J.S. Moroka, amapholisa nomNyango wezokuThuthukiwa kwaBantu ngesiFundeni seMpumalanga ngaKwaNdebele, bathole indawo engakatloliswa esikhungo sokulapha labo esele bakhahlunyezwe ziindakamizwa,kanye nalabo abangasimnandi emkhumbulweni.  Abasikibencema bathi babalelwa ema-200 abantu abatholakele ngaphakathi komakhiwo ongaphasi kwesonto ekuthiwa yi-St. John’s ngapahakthi kwe-Waterval “B”.

Kuvela bonyana uMfundisi thizeni nowakwakhe babanjiwe ngemva kokutholakala bonyana babanikazi bendawo le. Okubuhlungu ngendawo le,kubonakala kumakhiwo ongekho ezingeni elifanele ukuhlalisa abantu abalatjhelwa ukukhahlunyezwa ziindakamizwa nokulungisa umkhumbulo. Ngokombiko nezwangobatjho,kuvela ngasuthi uMfundisi ekuthomeni utjele umBuso bonyana isikhungwesi sakhe simumethe abantu abama-60,kodwana iinkhulu zomBuso nazingenako ngaphakathi komakhiwo zathola abantu ababalelwa ema-200.

Amapholisa nomNyango wezokuThuthukiswa kwaBantu nabangena kilomakhiwo nabeendaba kutholakale iwoma labantu libotjhwe izandla abanye banemivimbo yokudulwa,iinlonda nokubonisa ukungagomi kuhle ngendlela efaneleko. Kibo abantwaba abatholakele kilomakhiwo,okhunye okuvelako yindaba eveza bembaji nabengubo abavela eendaweni ezikude ngaphandle kwaKwaNdebele njenge;Hazyview,Mamelodi,Soweto kunye ne-Rustenburg.

Okubuhlungu endabeni le, yindaba kangazimbi weminyaka eli-14,kanye nabengubo abama-30. Kunezwangobatjho ebukhali bonyana uMfundisi ubhadelisa imindeni yalaba imali ezi-R3000 umuntu ngamunye ngenyanga ukubakhona kilesikhungo. Kuyavela bonyana umNyango wezokuThuthukiswa kwaBantu sele uhlele ukubuyisela abantu abali-132 emindenini yabo ngokuhlukana kwabo. Okhunye godu okuvelileko, mbiko oveza bonyana umNyango lo uhlela ukufudusa abaseleko ubafake eenkhungweni ezihlelekileko nezizitlolise ngapahasi kwawo umNyango lo.

UGift Skhosana ohlala khona kiloMaspalati we-Dr.J.S. Moroka naye ungomunye walabo abalatjhwa kiso isikhungwesi esise-Waterval “B”. Uthi umswa lo wakwaSkhosana isizathu sokubopha abanye izandla neenyawo, kubakhandela bonyana bangakghoni ukubaleka. “Nami ngingomunye okhewaba kiso isikhungwesi sokulapha abantu esele bangenwe ziindakamizwa.

Ukusibopha izandla neenyawo kungebanga lokukhandela ukungabaleki. Mina nje ngalatjhwa khona,bengaphuma eendakamizweni”,kutjho uGift Skhosana.

UTumisho naye ungomunye ophuma kiwo lomphakathi ngaphasi kwakaMaspalati we-Dr. J.S. Moroka. Naye uveza bonyana uphume kiso isikhungwesi njengombana wakhe waba nobudisi bokukhokha iindakamizwa. Okhunye akuvezako kusizeka kwakhe kilesikhungo. Into atlhayela ngayo uTumisho njenganje uthi kulungiswa komkhumbulo wakhe.

Ngesikhathi sihlanganisa umbiko lo.besingakazi ngoMfundisi nonakwakhe bonyana sebavelile ekhotho,nokuthi isikhungo sivaliwe namkha sisekhona na?. Esikwaziko njengoMkhozi mbiko oveza bonyana kuhlelwe ukuthathwa kwabanye bahlanganiswe nemindeni yabo,abanye bayiswe eenkhungweni ezitlolisiweko nezihlelekileko ezisebenza ngabantu abakhahlunyezwe ziindakamizwa.

Umthombo weendaba; ENCA,Newzroom Afrika

////////////////////////////////////////////////////////////////////////////////////////////////////////////////////////