MKHOZI

Cosmo City- Ithoma ukudlhabhaza indaba ye-Cosmo City la uMphathi wesikolo i-Cosmo City Secondary School uyala bonyana umfundi wesikolwesi abuye azokufunda njengabanye abafundi, ngemva kokuphetha isiko lakhe lesiNdebele lokuthatha ubusokona KwaDlawulale ngesiFundeni seLimpopo njengombana ikosi  beyithabile nje esitjhabeni samaNdebele wakwaNdzundza Mabhoko.

Kunezwa ngobatjho ethi uMphathi wesikolwesi bewakhuluma namagama alumelako ngamaNdebele bonyana ambatha ingubo ilanga litjhisa ngikho angakafundi nje,athola imisebenzi eentolo. Umma wesokaneli ekukhulunywa ngalo uveza bonyana uMphathi lo wesikolo uthe batjho ingoma iKwaNdebele kwaphela kungasi ngesiFundeni seGauteng.

Izenzo ezinjengalezi,neenkulumo zakhona kusilinge amaNdebele,neenhlangano ezinengi zomphakathi ukufaka amakhosi neenhlangano zamakhosi. UNomzana Thando Mahlangu mtjhotjhozeli ezintweni zamasiko wesiNdebele,ubile bewaqeda itjhukela nakakhuluma nge-Cosmo City. Ngokuya kwakaThando uthi basehlelweni lokuhlangana noNdunakulu we-Gauteng uNomzana Panyaza Lesufi kanye noSomkhandlu wezeFundo esiFundeni seGauteng uNomzana Lebogang Maile.

“Sizokuhlangana nabaphathi besiFunda seGauteng,esizokwenza kukuya e-Cosmo City siyokuvala isikolweso”,kutjho uThando Mahlangu umtjhotjhozeli wamasiko wesiNdebele. Unina lesokaneli uthi nanje isokana lisekhaya njengombana uMphathi wesikolo abhale ukumamukela ngobutjha bonyana azokufunda. Umma lo uthi isizathu soMphathi wesikolwesi isokana lidlulelwe sikhathi sokubuya esikolweni njengomfundi wesikolwesi . Wala uyaphetha umma wesokana uthi isokana lifike ngaphambi kwesikhathi,khenge liriyade.

UMengameli we-Congress of Traditional Leaders of South Africa uNdabezitha uMathupa Mokoena utjhiye alikhohliweko ngoMphathi wesikolo i-Cosmo City Secondary Schoool, uNdabezitha uMokoena uthi uMphathi lo akakathuki amaNdebele kwaphela,kodwana uthuke nabeSuthu be-Freystata kanye nabantu abanzima boke. “Akusiwo amaNdebele wodwa ambatha ingubo nabeSuthu beFreystata bayayimbatha”,kutjho uNdabezitha uMathupa Mokoena uMengameli we-CONTRALESA.

Ngokuyakwaka Ndabezitha uMokoena uthi ubawe uNobhala we-CONTRALESA bonyana atlole incwadi ehlose ukubonana nabaphathi besiFunda seGauteng. Nange ipendulo ingakabuyi izolo ngeLesine mhlaka 20 kuRhoboyi 2026,ngaphambi kwe-awa lesine, ukusuka lapho i-CONTRALESA indaba le izayidlulisela phambili ngokuya ekhotho./////////////////////////////////////////////////////////////////////////////////////////////////////////////////////