Kuhlonywe Ihlangano Yabothitjhere Esele Bathatha Umhlalaphasi KwaMhlanga
KwaMhlanga- Ngelanga Lokugidinga abothitjhere ephasini zombelele,naKwaMhlanga kubenjalo ngesikhathi kuhlonywa ihlangano yabothitjhere esele bathatha umhlalaphasi eyaziwa ngelokuthi yi-KwaMhlanga Retired Teachers Association. Ihlangano le iphethe boke abothitjhere esele bathatha umhlalaphasi KwaMhlanga,begodu imumethe amalunga angaphezulu kwekhulu namatjhumi asihlanu ukuya emakhulwini amabili.
Umsunguli wehlangano le ngubaba uMaleka naye onguthitjhera ngokufunda ofundise isikhathi eside. Unomzana uMaleka uveza bonyana wabona abothitjhere abanengi bahlezi emakhaya bangenzi litho,begodu bahlezi emasofeni abanikelwa wona mhla bavaleliswa la bebafundisa khona. Nakanaba ngekulumo uNomzana uMaleka uthi lokho kwamenza bonyana athome ijima lehlolombono, la abonisana khona nabanye ekhe bababothitjhere nge-eShowground yaKwaMhlanga manqophana nokuthoma ihlangano yabothitjhere esele bathatha umhlalaphasi.
Ngendlela akhuluma ngayo ubaba uMaleka uthi angathanda ukubona abanye abothitjhere nabo bavusa ihlangano le, yabothitjhere esele bathatha umhlalaphasi wabe wenza nesibonelo esithi kungaba yi; Kwagga Retired Teachers Association namkha Vlaklaaget Retired Teachers Association njalo njalo,begodu bameme iKwaMhlanga Retired Teachers Association emihlanganweni yabo izobabonisa.
Amalunga wehlangano le bothitjhere ababuya eenkolweni ezihlukileko kodwana bothitjhere esele bathatha umhlalaphasi. “UZimu waletha lombono bonyana ngihlanganise abothitjhere,ngavakatjhela abothitjhere abanengi sahlangana endaweni ye-eShwoground KwaMhlanga. Uzimu waletha lombono bonyana sithome ihlangano le,ngetjhudu siyihloma ngelanga la iphasi lidingida khona ilanga labothitjhere”,kutjho ubaba uZolile Maleka.
Ikomidi yehlangano le kwanjesi ngeyesigiyani,nanyana kunjalo kodwana izokuhlangana njalo ukudemba izinto ezithinta abothitjhere nabentwana besikolo,ifundo nokhunye emphakathini we-wodi 32 KwaMhlanga. Kuzakuthi ke nasele kufike isikhathi la kujanyiswa khona ikomidi ezeleko,kuzakubizwa imbizo la kuzokukhethwa khona amalunga wekomidi leyo.
Njengabothitjhere nabakhwela esiteji abanye babo bebavukwa madlharuma ngokudzubhula iinkondlo zakade ezatlolwa batloli balokha isiNdebele singakabi lilimi elitlolwako,iinkondlo zesiZulu zesiTswana nesiPedi.
Ikhansela udade uBathabile Nkosi naye ubakhona phakathi kwamalunga wehlangano le i-Kwamhlanga Retired Teachers Association. Nakakhulumako njengekhansela uBathabile uthe abothitjhere ubathatha njengababelethi bakhe,begodu usemntwanabo. Ikhansela liveze netuthuko esele ikhona KwaMhlanga kuwodi 32,wabawa bonyana njengombana kukhona ituthuko ekhona kuwodi 32 nje, akube babantu bewodi 32 abahlomulako ngokomsebenzi. “Ngithokoza ukumenywa ngini njengomntwana wenu”,kutjho uBathabile Nkosi ikhansela lewodi 32 KwaMhlanga.
Umhlonitjhwa uSiphosezwe Masango owaziwa khulu KwaMhlanga naye ubakhonapho. UDumako naye unguthitjhera ngokufunda begodu wakhe wabaMhloli weenkolo. Umnyanya uphele ngokubiza amalunga woke wehlangano le bonyana azokuthatha iinthombe,ukusuka lapho yatjho ingoma ethinta iKwaMhlanga Retired Teachers Association.
////////////////////////////////////////////////////////////////////////////////////////////////////////////////////////