MKHOZI

NgeLehlanu mhlaka 9 kuSewula 2026

Ngesidleni sithombe sakwa Iso Lezwe:UNomzana Nkosikhona Ndabandaba owaziwa khulu ngelikaPhakela uMthakathi uyabila ngendaba yomyalo weKhotho-Sisekelo bonyana amaphandle angenamvumo anikelwe imvumo yokubasenarheni njengabaphalali.

Ngenzasi sithombe se-Facebook: Udade uJacinta Ngobese Zuma naye ubile waqeditjhukela ngendaba le.

Ngemva kweKhotho yoMthetho-Sisekelo ikhuphe umyalo othi, woke amaphandle angenamvumo zokuba senarheni yeSewula Afrika akanikelwe imvumo yokubhaciswa njengabaphalali. Iinarha ezibalwako endabeni le kubalwa lezi ezilandelakoi; Itopiya,Somaliya,Phakhistani,Bhangladetjhi, lezi kuziinarha ezinikelwe ithuba lokuzitlolisa njengabaphalali ababalekele izipi la babuya khona.

Lesi kusisenzo esenze bonyana iinhlangano zomphakathi ezibeka ama-Sewula Afrika phambili bonyana zibile beziqede itjhukela. Inengi labantu lizibuza bonyana kuyakghonakala ukuba nabantu bangaphandle abanganamvumo,khonapho kuthiwe awa,abanikelwe imvumo yokuba senarheni le njengabaphalali. Lesi kusisenzo esirare ama-Sewula Afrika amanengi khulu lawo abekaphambili inarha yawo yeSewula Afrika.

Kubonakale umakhiwo womNyango wezeKhaya eThekwini ngesiFundeni saKwaZulu Natal uzele umjeje omude wamaphandle afuna imvumo yokuba senarheni le. NgesiFundeni sePumalanga Kapa eGqeberha nakhona kube ngiso leso, sokubona amaphandle ajame umjeje omude ngaphandle komakhiwo womNyango wezeKhya,ukufaka hlangana indawo ye-Marabastad ngaphasi koMaspalati we-Tshwane Metro ePitori ne-Soweto ngeJwanasbhege.

IKhotho yoMthetho-Sisekelo inikele umyalo uNgqongqotjhe wezangeKhaya uDorhodera Leon Schreiber bonyana anikele amaphandle la imvumo yokuba senarheni yeSewula Afrika. Udade uJacinta Ngobese Zuma we-March and March uthi koke lokhu okwenziwa nguRhulumende akusikho. “Abantwaba abaziwa bonyana babobani babuyaphi,ngombana kwabona abakatloliswa la babuya khona’,kutjho umrholi we-March and March Movement uJacinta Ngobese Zuma.

Omunye olwela ukubeka ama-Sewula Afrika phambili uNomzana Nkosikhona Ndabandaba owaziwa khulu ngelika “Phakela uMthakahi”,naye ukhuza akaqedi ngokwenziwa nguRhulumende we-Sewula Afrika. Ubaba uNdabandaba uthi kwabonakala amaphandle we-Malawi athutha abuyela emakhaya la avela khona, alo ke ngabanjani laba abanikelwa imvumo yokuhlala. “Njenganje iSewula Afrika isemrarweni wetjhirho,nala inengi labantu lingasebenzi khona,nanyana kunjalo uRhulumende usababuyisa godu”,kutjho uNkosikhona Ndabandaba.   

/////////////////////////////////////////////////////////////////////////////////////////////////////////