Badosemhlweni KwaNdebele Ngokukhuphuka Kwe-PUTCO
MKHOZI
Mkhozi Namba Skhambe NgeLesihlanu Mhlaka 16 KuVelabahlinze 2026
Indaba Kubika uMkhozi
Pretoria- Badosemhlweni abantu baKwaNdebelele ngendlela iinthuthi zakwa-PUTCO zibiza ngayo. Njalo ngomnyaka ikampani yakwa-PUTCO ingezelela imali emathikithini wabakhweli. Babalelwa ku-99,9% abantu baKwaNdebele esiFundeni seMpumalanga abasebenzisa iinthuthi zomphakathi zakwa-PUTCO ukuya emsebenzini phakathi kwePitori neKwaNdebele.
Mva nje abakhweli beembhesi zakwa PUTCO bavuke ekuseni ngesamarimarima bavukela eMoloto ukuyokhandela iimbhesi zakwa PUTCO bonyana zingayi ePitori begodu kungabi nomuntu ozikhwelako. Lokhu kungebanga lokulila ngamathikithi abizako, ngendlela engamukelekiko. Likhutjhulwe nge-10% ithikithi lakwa PUTCO ebantwini baKwaNdebebele kodwana lokho kukodwa yimali enengi khulu kibo.
Ngokomthetho kuyavela bonyana uPUTCO bekufanele akhuphule ithikithi lakhe nge-35% kodwana wathatha isiqunto sokulikhuphula nge-10%. Ngokuya kwaka Lindokuhle Xulu umkhulumeli wakwa-PUTCO,bekungasiso isifiso sabo sokukhuphula ngalendlela. UNomzana Xulu uthi ikampani yakwa-PUTCO ineendleko ezinengi khulu nezingajameleki njengombana iimbaseli zikhuphuke kangaka.
Ithikithi leveke ukusuka eendaweni ezihlukileko KwaNdebele ukuya ePitori lingabiza phakathi kwe-R250/R350 kuthi lenyanga lingaba yi-R900/R1400. Kuhluka ngeendawo nokutjhidelana kwazo njengombana iKwaNdebele iyikulu kangaka. “Ikhuphuke khulu intengo yeembaseli lokho nathi kusifaka ngaphasi kwegandelelo lokukhuphula nge-10% nanyana bekufanele sikhuphule nge-35%” kutjho uNomzana Lindokuhle Xulu wakwa PUTCO. Nakaragela phambili uNomzana Xulu uthi ubawa bonyana abantu baKwaNdebele basebenzisane no-PUTCO, ngombana kwayena PUTCO bekube nje ungaphasi kwegandelelelo.
Ngokwekulumo kaNomzana Xulu ikampani yakwa PUTCO ilahlekelwe yimali engange-R40m ngomnyakamali odlulileko,ukufaka hlangana nokuthenga iimbhesi ezitja nokulungisa lezi zakade. Ikampani yakwa-PUTCO ikhamba phezu kweMoloto Road ku-R573 phakathi kwePitori neKwaNdebele. Indlela yeMoloto Road yindlela yesiminyaminya efuna iimbhesi ezikhambako.
//////////////////////////////////////////////////////////////////////////////////////////////////