MKHOZI

NgeLesibili mhlaka 15 kuKhukhulamungu 2026-ikhasi 1

Ngemva kokuthi iinhlangano ezimbili zeSewula Afrika i-March and March kunye ne-Operation Dudula zabetha phasi ngenyawo zikhupha amaphandle azele eSewula Afrika ngaphandle kwemvumo yokubakhona enarheni yeSewula Afrika. Ihlangano yezepolotiki i-ACTIONSA nayo yabetha phasi ngenywao yathi awa sekwanele abakhambe kwanjesi babuyele emakhabo.

Zinengi iinhlangano zomphakathi ezalilako zithi amaphandle la ayadlelezelwa,ukufaka hlangana neenhlangano zepolotiki ezajamelamaphandle. Mvanje inarha yeKenya iqothe amaphandle avela eBhurundi bonyana aphume aphele enarheni yeKenya. UMengameli uWilliam Ruto weKenya uthi zoke iintolo ezakhiwe maphandle ziintolo zabantu beKenya.

Khekwa bonakala abaphalali beBhurundi bahlangene boke emakhiweni wobuZenda beBhurundi eKenya bafuna ukuhlaliswa njengombana uMengameli weKenya ulikhomba libaba bonyana abaphume baphele enarheni yeKenya. Endabeni le kukhulunywa ngabaphalali beBhurundi abayi-16000 ngaphasi kwehlelo lokukhoseliswa.

URhulumende weKenya uthi ufuna amaphandle aphethe imvumo yokuba senarheni leya,uthi amaphandle angenamvumo akaphume aphele eKenya. Ngikho ke kutholakala bonyana inengi lamaphandle la ngavela enarheni yeBhurundi,begodu akanazo iincwadi ezibavumela ukubasenarheni yeKenya. //////////////////////////////////////////////////////////////////////////////////////////////////////////////////

NgeLesibili mhlaka 15 kuKhukhulamungu 2026-ikhasi 2

Kukhandelwa Iinthuthi Zabentwana Besikolo

URhulumende weMpumalanga ngaphasi komNyango weeNthuthi unehlelo lokuthutha abentwana beenkolo, kizozoke iimphande ngaphasi kwesiFunda seMpumalanga. Njalo ngemva kweminyaka emihlanu kubakhona isivumelwano esitjha phakathi komNyango wezeeNthuthi nabanikazi beembhesi ezithutha abentwana besikolo.

Ngemva komnyaka-mali omutjha womnyaka lo ka-2026/7,kungene isivumelwano esitjha la umNyango lo wamukele khona abanikazi beembhesi abatjha abazokuthutha abentwana kizo zoke iimphande esiFundeni seMpumalanga. Okubuhlungu okwenzakele ngabathuthi abatjhaba,kazi babhalelwe kuthatha abentwana eendaweni zabo la kufanele babathathe khona,ngebanga lokuthi laba esele kuphele iimvumelwano zabo kubonakala bangafuni abentwanaba bathuthwe ngilaba abafikako.

Isililo salaba abaphelelwe ziimvumelwano zokuthutha abentwana sithi indaba yethenda khenge ikhambe kuhle. Ngakwelinye ihlangothi uMjaphethe womNqophisi emNyangweni wezenThuthi esiFundeni seMpumalanga uthi ithenda yanikelwa abantu abafaneleko. UNomzana June Sibiya uthi lethenda yatholwa babantu mbala abafanele kulithola ayijiki lendaba.

UNomzana Sibiya uthi iinthuthi zabentwana beenkolo zikhandelwa babelethi,ziinhlangano ezithize, banikazi beembhesi esele balahlekelwa msebenzi lo wokuthutha abentwana beenkolo. Ngokuya komNyango lo, zi-226 umnyaka lo iimbhesi ezithutha abentwana beenkolo esiFundeni seMpumalanga. Kuyavela bonyana isivumelwano esitjha sithome mhlaka-1 kuKhukhulamungu 2026,kodwana yoke into ijamile akunamntwana oyesikolweni.

Ngomnyaka ophelileko iinthuthi zabentwana beenkolo beziyi-136. UNomzana Sibiya uthi umnyaka lo kungezelelwe iimbhesi. Endabeni le,Kunababelethi abaveze bonyana uRhulumende wesiFunda usebenzisa iinkorokoro namkha amatlhere weembhesi ezifa endleleni,begodu ezinye zazo azinamabhrigi zifaka ipilo yabentwana babo engozini. Okhunye godu okuvezwa babelethi yindaba yokungabhadelwa kweenthuthi ngesikhathi.

Koke lokho uNomzana June Sibiya uyakulandula uthi ayikho into enjalo,umNyangwakhe ubhadela ngesikhathi. “NjengomNyango sizinikele ukusebenzisana neenthuthi zabentwana beenkolo ngokubhadela ngesikhathi phakathi kwamalanga ama-30. Okhunye godu iimbhesi zethu ziyahlolwa njalo nje. Nakukhona okungekho emthethweni okubonakala eenthuthini zethu zabentwana bethu beenkolo ababelethi ababike koke emapholiseni”,kutjho uNomzana June Sibiya,uMjaphethe emNyangweni wezeenThuthi esiFundeni seMpumalanga.

////////////////////////////////////////////////////////////////////////////////////////////////////////////////////////

NgeLesibili mhlaka 15 kuKhukhulamungu 2026-ikhasi 1

Isiyeleliso

Iphephandaba uMkhozi liphephandaba lesiNdebele elithi nange kukhona umtlolo olumelako namkha ukukhuluma kumbi ngomunye umuntu ngaphandle kwesizathu nobufakazi, loyo muntu unelungelo lokufaka umlandu nanyana kukuphi la kusebenza khona umthetho weSewula Afrika ngaphasi koMthetho-Sisekelo wakhona.

Isaziso

Iinthombe ezibekwe tjhatjhalazi ku-inthanethi  siyaziboleka bese siyatjho bona ziinthombe ezibolekiweko, akusizo iinthombe zethu. Ngaphandle kweenthombe zabentwana ababulanzi namkha abantu ababulanzi ngekhe sizisebenzise iinthombe ezinjalo. Iindaba zethu esizitlolako ezinye zazo ziindaba ezisepepeneneni ngokweemthombo ethembekileko yeendaba. Nakho lokho siyakuveza asikufihli nange indaba kungasiyo yethu. Iziko leendaba lisebenza njalo, ngokufaka neminye iimthombo yeendaba. Akusiwo umlandu ukubolekisa ngenye indaba namkha ukudlulisa umbiko kwelinye iziko leendaba nange umthombo loyo uthembekile. Yoke indaba namkha umbiko okungasikho kwethu siyaveza bonyana msebenzi kabani, asenzi kwangasuthi msebenzethu.

Umkhozi utloliswe njengephephandaba elitlola iindaba ngesiNdebele.  Sivikela abentwana abangaphasi kweminyaka elitjhumi nekhomba, abachwalileko, iindwala, nokuveza iinthombe zabo nabangakghoni ukuziphendulela njengabongazimbi ngaphandle kwesizathu. Siyakukhandela ukuthatha iinthombe endaweni la kungakafaneli khona ngaphahndle kwemvumo. Ungathumela imibono nokuthi singenzanjani ncono ephephandabeni uMkhozi. 

Siyatholakala ku:

2942 Kwagga “C”

Kenang Security Training Building:Kwagga Police Station Street

Empumalanga 0458.

Mpumalanga Province

South Africa

Home

Mkhozinews.co.za

Iposomoya:consultant@mkhozinews.co.za

Umkhangiso:ads@mkhozinews.co.za

+ 72 074 5899/ +73 2068 645

———————————————————————————————-

NgeLesibili mhlaka 15 kuKhukhulamungu 2026-ikhasi 4

NgeLesibili mhlaka 15 kuKhukhulamungu 2026-ikhasi 5

Liphezulu Izinga Lokubulala Bengubo EBhetali

Bethal/eMzinoni: Ngeveke nje sekutholakale imizimba yabantu ababili abangasekho bengubo eMzinoni eduze neBhetali esiFundeni seMpumalanga. Kuthiwa imizimba le itholakale esikghweni omunye unamanceba wokuhlatjwa ngomukhwa. Lo wengubo othalakele ngesikghweni kuthiwa mumuntu wengubo utholakale ahlongakele namanceba wokuhlatjwa ngomukhwa.

Kunezwangobatjho ebukhali ethi udade lo uThembi Lukhele (46) ugcinwe abonakele akhamba nomntwakhe wembaji nakuzakuthiwa selahlongakele nje. Ngokuya komkhozi kadade lo ohlongakeleko uJosephine Mathebe, uthi bebaboke endaweni yokuzijuguja,bakhambe boke ukuphuma endaweni yokuzijuguja nalaba ababili. Udade lo uJosephie Mathebe uthi urareke khulu nakezwa bonyana umkhozakhe utholakale esikghweni selahlongakele namanceba wokuhlatjwa ngomukhwa,njengombana abagcine babobabili.

Kunodade la uJabulile Dladla we-Bethal Women”s Forum,yena uthi indawo yeBhetali ibonakala irhagele khulu nakuza ekubulaweni kwabantu bengubo. “Ngomnyaka ophelileko besisekhotho la kwabulawa khona omunye osikhwatjha. Njenganje sithi umthetho awudlale indima yawo”,kutjho uJabulile Dladla we-Bethal Women’s Forum.

UJabulile Ndubane okhulumela isipholisa esiFundeni seMpumalanga uthi umsolwa ubotjhiwe ngokusolelwa ukubulala umuntu wengubo,kodwana umsolwa loyo ngelanga elilandelako angaphakathi esitokisini naye uvuke ahlongakele.

Umthombo weendaba:SABC

////////////////////////////////////////////////////////////////////////////////////////////////////////////////////////

NgeLesibili mhlaka 15 kuKhukhulamungu 2026-ikhasi 6

Kuthengiswa Izindlu Ezima-RDP

UmNyango wezokuHlaliswa kwaBantu ulila ngabantu abathengisa izindlu ezima-RDP zithengiselwa amaphandle esiFundeni seGauteng. Kuvela bonyana mbala izindlu zomBuso ezaziwa ngelokuthi ngezima-RDP kunabantu abazithengisako njengombana kungakafaneli bonyana zithengiswe nje.

AmaSewula Afrika amanengi ayalila, aveza bonyana kade bazitlolisela ukuthola izindlu zomBuso ezima -RDP, kodwana izindlwezo zibonakala kuhlala amaphandle inengi lazo. Okhunye okuzwakalako yindaba ethi batjho laba abathengisa izindlwezi ezima-RDP,ziinsebenzi zawo umNyango lo wezokuHlaliswa kwaBantu,nanyana izwakala njalo indaba le umNyango lo uyakuphika lokho.

UmNyango wezeZindlu esiFundeni seGauteng uthi loyo ozokubanjwa namkha ibizo lakhe litholakale livela ekuthengisweni kwezindlu ezima-RDP kuphelile ngabo. Kuvela bonyana izindlwezi zithengiswa ukusukela ku-R70 000 ukuya ku-R100 000. Umthetho wezindlu ezima-RDP uthi umuntu kufanele ahlale kiyo iminyaka ebunane, ngemva kwalokho angayibuyisela emNyangweni wezokuHlalisana kwaBantu.

Ngokomthetho kuyavela bonyana izindlu ezima-RDP azithengiswa,begodu nange kukhona umuntu othengisela omunye indlu kufanele aveze ubufakazi bobunilazi manqophana nendlu leyo kodwana kungasi yindlu eyi-RDP. UmNyango uyelelisa bonyana abantu abaye emapholiseni bayokubika nange kukhona umuntu othengisa indlu eyi-RDP. Umthombo weendaba:SABC

////////////////////////////////////////////////////////////////////////////////////////////////////////////////////////

NgeLesibili mhlaka 15 kuKhukhulamungu 2026- ikhasi 8

NgeLesibili mhlaka 15 kuKhukhulamungu 2026-ikhasi 9

URhulumende Ubuyekeza Ihlelo Lesibonelelo Sabadala

Kunabantu abadala abangakhenge bathole imalabo yesibonelelo sabantu abadala. Lokhu sekutshwenye inengi labantu abadala abathola imali yesibonelelo esivela kuRhulumende. Ngakwelinye ihlangothi isiKhwama sesiBonelelo siveza bonyana abantu abathola isibonelelo abangathuki ngombana uRhulumende ubuyekeza ihlelo lakhe lokuthola bonyana mbala kurhola abantu ekufanele barhole na?,njengombana kurhagele ubulelesi obungaka enarheni.

Khekwavela bonyana mbala kukhona engakhenge bayithole imalabo,kodwana kube yinto yesikhatjhana nje,nalapho uRhulumende uthe uyalungisa njengombana ufuna ukuthola isiqiniseko sokuthi mbala kurhola abantu abafanelwe yimali le na?. IKulu yakwa –SASA uNomzana Themba Matlou uthi isibonelelwesi sibonelelo esifanele abantu abanganalitho nesele bafike esigabeni sokurhola imali yabadala.

“Emnyakeni lo sithathe inyathelo lokubuyekeza ihlelo lethu lalabo abarhola imali yesibonelelo sabadala. Lokhu sikwenza ngokusebenzisana namabhanka kunye neZiko lezoMthelo weSewula Afrika ukuthola bonyana mbala imali le irholwa babantu abafaneleko’,kutjho iKulu yakwa-SASA uNomzana uMatlou. UNomzana uMatlou ubawe boke abantu abarhola isibonelelo sakwa-SASA bonyana basebenzisane neziko lakhe lakwa-SASA.////////////////////////////////////////////////////////////////////////////////////////////////////////////////////

NgeLesibili mhlaka 15 kuKhukhulamungu 2026-ikhasi 10

NgeLesibili mhlaka 15 kuKhukhulamungu 2026-ikhasi 11

UNgqongqotjhe UHlabisa Ukhuluma Ngokubusa KwaboMaspalati Ngonembeza

UNgqongqotjhe wezokuBusaHlanganyela neeNdaba zamaKhosi umhlonitjhwa uVelenkosini Hlabisa ukhuluma  ngehlelo lokubusa ngonembeza kwaboMaspalati. Kilehlelo aboMaspalati bayazibophelela bonyana bayokuphatha njani abantu, babusenjani iindawo zabo.

Kulapho ke uMaspalati omunye nomunye kufanele atlikitle ngendlela yokuzibophelela bonyana,mbala uyavuma indlela ayokubusa ngayo indawo asebenzela kiyo. Uthi uNgqongqtjhe boke aboMaspalati kufanele bazibophelele kilelihlelo alibiza ngelokuthi “Kubusa kwaboMaspalati ngonembeza”. Njenganje bayikhulu aboMaspalati esele batlikitle kilelihlelo.

UNgqongqotjhe uthi uthemba bonyana boke aboMaspalati abangakatlikitli kilelihlelo, abakhulu nabancani bazokutlikitla kungasikade. Kulelihlelo uMaspalati noMaspalati uzokuqalwa indlela aebenza ngayo bonyana wenza zona na?.Koke lokhu kuzokwenza bonyana aboMaspalati babonakale basebenza,begodu labo abangasebenziko bazokubonakala msinyana.

Ngokuya kwakaNgqongqotjhe ihlelo elinjengaleli kufanele lisebenze ngemva kwamakhetho womnyaka lo mhlaka 4 Novemba 2026. Lokho kutjho bonyana akakho uMaspalati ozisebenzela nje ngaphandle kwehlelweli. “AboMaspalati bazokubusa ngonembeza ngikho uMaspalati omunye nomunye kufanele atlikitle”,kutjho umhlonitjhwa uHlabisa.

Umthombo weendaba:SABC

////////////////////////////////////////////////////////////////////////////////////////////////////////////////////////

NgeLesibili mhlaka 15 kuKhukhulamungu 2026-ikhasi 12

NgeLesibili mhlaka 15 kuKhukhulamungu 2026-ikhasi 13

UmBuso Uthi Awusenamali Yama-R370

Ezibuhlungu ezivela emBusweni zithi umBuso uthi awusenamali yokuragela phambili ukubhadela imali yama-R370 njalo ngenyanga okuyimali yesibonelelo salabo abangasebenziko.  Lesi kusibonelelo somBuso esaqangulwa mBuso ngsikhathi seKhovidi ukusukela ngomnyaka ka-2020.

Ngesikhathi uMengameli Cyril Ramaphosa nakathoma isibonelelo esinjengalesi, bekaqalelele labo abangasebenziko ilutjha nabadala. Isibonelelo esinjengalesi kunabantu abathi siyabasiza akufani bayawuthenga umgodla wepuphu. Abanye bathi awa,bona abakatholi litho okusibonelelo sama-R370 bekube khathesi,

Kunabantu esele bajayele ukuthola isibonelelwesi,kodwa umBuso sele uveza bonyana awusakghoni ukuragela phambili ngaso. Izazi zomnotho nazo ziveza bonyana umBuso uyokhamba bekufike la ubhalelwa khona kubhadela imali yesibonelelo sama-R370. Imali le yathoma yaba yi-R350 ngomnyaka ka-2020,kwathi ngomnyaka we-2024 yaba ma-R370.

Kukhona iinhlangano ezimangalele unBuso bonyana imali yesibonelelo ikhuphuke njengombana ipilo Ibiza kangaka enarheni,begodu yoke into iyabiza ukufaka ukudla phakathi. UmBuso uthi iKhotho eKulu yePitori ifaka ipumulo eendabeni engazazi ngokungaqali ubujamo beemali eendabeni zomnotho enarheni,njengombana ifuna bonyana imali le ingezelelwe ukuyaphezulu.  

Bekube nje iKhotho yokuziBilayeza iimLandu eBloemfontein esiFundeni seFreystata ayikakhuphi isigwebo bonyana ukusuka la kuyiwaphi,njengombana isaqala amahlangothi womabili nje iinhlangano ezimanagalele umBuso njengombana zithi sincani isibonelelwesi asikhuphuke njengombana iznto zibiza nje,ngakwelinye ihlangothi umBuso uthi uyabhalelwa kuragela phambili nesibonelelwesi uyalisa kwanjesi. Umthombo weendaba:WETHU NEWS

////////////////////////////////////////////////////////////////////////////////////////////////////////////////////////

NgeLesibili mhlaka 15 kuKhukhulamungu 2026-ikhasi 14

Ukutlogonyelwa Kwemvelo

Ukutjhuguluka Kwamazinga Wokutjhisa

Kufike isikhathi la imvelo nobuhle bayo kutjhuguluka khona ephasini mazombe. ISewula Afrika itjhugulukile bakwethu,kizo zoke iimFunda zakhona ukufaka isiFunda seMpumalanga ngesiphandeni seKangala. Nawuthatha indawo yaKwaNdebele yindawo la ubusika bunganazulu,kodwana mva nje kubonakale ubusika bakhona bunezulu.

Inyanga kaKhukhulamungu yinyanga enganazulu kodwana mva nje kubonakele sekuna izulu ngayo inyanga kaKhukhulamungu. Ngapha KwaNdebele izulu lithoma ukuna ngenyanga yeSewula bekufike inyanga yeNtaka ngomnyaka olandelako. Koke lokhu kungebanga kokutjhuguluka kwamazinga wokutjhisa.

Uyabona isiFunda seTjingalanga Kapa izulu lina ubusika nehlobo. Abantu bakhona sebajayele ubujamo bezulu la lina khona ubusika nehlobo. IKangala njengesiphande ngaphasi kwesiFunda seMpumalanga ithoma ukubona izulu ebusika. Nakutjhisako kutjhisa ngokweqa,nakumakhaza kubamakhaza ngokweqileko.

Koke lokhu kubangwa yindaba yokungatlhogomeli imvelo. Imvelo yethu ayisimnandi ngombana asikayiphathi kuhle.  Okubuhlungu sibona ilwandle libile laqeda itjhukela, amanzi welwandle adlhabhaza bekaphume ngaphakathi kwelwandle ayokutheleka le kude. Izindlu ezakhe eduze kwelwandle mva nje zihlelelevalweni leenkhukhula,zingakhamba nanyana kunini nakuna izulu.

Iimlilo evutha emarharheni yona siyitjhiya njani nakunje. Uyabona lokha kade iimlilo beyivutha ebusika emangweni ngombana utjano bomile,kwanjesi kubonakala kuvutha iimlilo yehlathi,emarharheni ngasuthi bawudlhuwelele ngeembaseli,kanti awa. Iimlilo le iyabonakala ngaphetjheya kwelwandle eenarheni ezinengi khulu,eSewula Afrika kuba yiKapa la ubona khona kuqubuka umlilo wehlathi. Koke lokho kutjho ukutjhuguluka kwamazinga wokutjhisa.

////////////////////////////////////////////////////////////////////////////////////////////////////////////////////////

NgeLesibili mhlaka 15 kuKhukhulamungu 2026-ikhasi 15

Mkhozi Namba Skhambe

Ubuhle Obunethabo I-Radio Ndebele

Umrhatjheli womphakathi, iHlangano yezokuRhatjha ngoMoya eSewula Afrika, umnyaka lo igidinga iminyaka ematjhumi alithoba yathoma ukurhatjhela umphakathi weSewula Afrika. Akhe siqale nakumrhatjho owaqangula ukurhatjha ngomnyaka ka-1983. Sikhuluma nge-Radio Ndebele nge-Weavin Park Kwamnyamana.

Umlando we-Radio Ndebele sizawukha ngaphezulu njengombana unothile nje. NanguMphathi womrhatjho lo, uNomzana Oupa Mahlangu. Abanye babarhatjhi abazenzela igama kilokoro yezokurhatjha ngelimi lesiNdebele ngilaba;Micky Malatse kaSibanyoni,Phillip “Nzimanzima”Mahlangu, Peter “SP’ Mahlangu, Raymond Ntuli,phillip “Thiza-Thiza” Mahlangu, Mandlakayise Masanabo,Flomi Skhosana, JPS,Kwaito,Msiko Sayza wala kwa-Radio Ndebele,November Mbonani,Skhumbuzo Mnguni,Johnny Ntambo Sibanyoni ukubala nje imbijana yabo.

La ku-Radio Ndebele kungaphambi kwaka-1994, la sabona abarhatjhi bembaji bazakhela ibizelo elitjha ekorweni yezokurhatjha ngelimi lesiNdebele. Abomma bakhona abezwakala ku-Radio Ndebele nasingababala nje;uNodathile Skhosana,Rinah Ndimande,Nofanezile Matjhiyana nabanye. Kilomrhatjho kwakhe kwabanamahlelo amnandi namahlelo akhako ukufaka nowabantu abatjha.

Amanye wamahlelo akhe abakhona ngilawa alandelako; Phanagela,Lala Mphefumulo Wami,Tjhidela Ngikuphakele,Kuhlatjiwe Ngakwethu,Lapha ke Malalantethe, Ngezemthonjeni, Ukutlhogonyelwa Kwemvelo,Sakha Ilimi Lethu, Zala Nale namanye amahlelo adumako. La, mbala kwakusalalelwa umrhatjho begodu woke umuntu bekafuna ukubamrhatjhi khatheso.

Omunye umrhatjhi owazakhela igama emNyangweni wezeKolo kwa-Radio Ndebele Mfundisi uBhra Ike Mtshweni, ehlelweni “Ilizwi Lakho Liyikesi”. La sifaka nobaba uMasango owaziwa khulu ngo “Rarhubuchaka”.  Omunye wabarhatjhi obekaziwa ngomvumo khulu Mbanezulu u-Irvin Kekana. Mbala kwakumnandi ukulalela umrhatjho khatheso.  Zitjhugulukile ke iinkhathi bakwethu,namhlanjesi sikhuluma ngeKwekwezi Fm.

////////////////////////////////////////////////////////////////////////////////////////////////////////////////////////