MKHOZI

Mkhozi Namba Skhambe NgeLesihlanu Mhlaka 04 kuKhukhulamungu 2026

Ngesinqeleni ngusiHlalo webandla uNomzana S.J Motau. Ngesidleni nguNomzana uMotha iSekela likaNobhala webandla.

Ibandla lemtjhade kwaNdabezitha uBongwe kaMagobholi elinzinze KwaMhlanga lidemba iindaba zomphakathi

Njengombana izinto sezatjhuguluka eSewula Afrika ngendlela yokugweba imilandu ngesintu, namkha ngendlela yamakhosi wendabuko. UmBuso weSewula uyawazisa amakhosi wendabuko enarheni zombelele,nakizo zolithoba iimFunda zeSewula Afrika. UmBuso weSewula Afrika ubeke imithetho ejamela amakhosi wendabuko ikambiso ngendlela ekufanele asebenze ngayo.

Ikambiso yamakhosi wendabuko indlela asebenza ngayo ifaka phakathi umsebenzi wokugweba. Okutjho bonyana umtjhade nomtjhade ubanebandla lakhona eligwebako. Ibandla libanamakomidi ahlukileko nangokuhluka kwemisebenzi yomtjhade loyo.  UMthetho-Sisekelo weSewula Afrika uyavuma bonyana amakhosi wendabuko asebenze ngendlela yawo yobukhosi,ngombana kwakade inarha kwakuvele kungeyamakhosi.

Ibandla likaNdabezitha uBongwe kaMagobholi belihlezi kwesibili ngeLesine sevekephelileko ngemva kobana ikosi beyithabile nje eenyangeni ezidlulileko. Ibandleli likhona ngemtjhade ekosini kwaMagobholi,ngaphakathi KwaMhlanga ema “C”. Isiqunto esithathwe libandleli ngesokufisa ukusebenzisana nekhotho yaKwaMhlanga,njengombana abanye bagweba ngendlela yesintu kube nabanye abagweba ngendlela yesikhuwa. Nakakhuluma kilomhlangano webandla waqobe ngeLesine,ubaba uBhorholo iSekela likasiHlalo ekosini kwaBongwe kaMagobholi uthe lomhlangano uveze ukuqakatheka kokusebenzisana nekhotho yaKwaMhlanga njengombana yona igweba ngendlela yesikhuwa nje.

Ubaba uSkhosana (uGajana) ungelinye lamalunga kilo ibandleli lemtjhade wakwaBongwe kaMagobholi. Ubaba uGajana uyibeke yakhanya bha! indaba bonyana kuqakathekile amalunga webandla alemuke umthetho wamakhosi wendabuko. La uGajana ukhe wadzubhula noMthetho-Sisekelo wenarha ngamaLungelo woBuntu.

Enye into ekhulunyisiwe yindaba yefundobandulo ekufanele ibekhona ngemtjhade wakwaBongwe kaMagobholi. UNdabezitha uBongwe kaMagobholi ngobukhulu bakhe uveze iphuzu eliqakathekileko lefundobandulo. UNdabezitha uthe akutlhogeki bonyana umtjhade uqhatjhe umuntu ozkufundisa ngamakghonobandulo.

Ngokuya kwakaNdabezitha ibandla lakhe liphethe woke umhlobo womuntu onelemuko nekghono,uNdabezitha uveza bonyana akutlhogeki batjho bangaqhatjha umuntu wokubafundisa iimthetho yesintu eyaphasiswa ePhalamende yeSewula Afrika. Umtjhade wakwaMagobholi uphethe ibandla elimumethe abantu bembaji nabasikazi ngokomsebenzi abahlukaniselane wona ngemtjhade,ukwenzela bonyana umphakathi usizakale begodu uthuthuke kufaka phakathi nokuqala ukuziphatha kwabantu. Ngesikhathi kuhlanganiswa lombiko,kunekomidi ebekufanele iyokuhlangana noMarhastrata wekhotho yaKwaMhlanga namhlanjesi njengombana kungeLesihlanu nje. Isizathu sokuvela ekhotho yaKwaMhlanga sifiso sokusebenzisana kwamahlangothi amabili la.

////////////////////////////////////////////////////////////////////////////////////////////////////////////////////////

////////////////////////////////////////////////////////////////////////////////////////////////////////////////////////