MKHOZI

Mkhozi Namba Skhambe NgoSonto Mhlaka 30 kuRhoboyi 2026

UmNyango wezoBulungiswa nokuThuthukiswa koMthetho-Sisekelo ngoburholi bukaNgqongqotjhe uMmamoloko Kubayi ukhulumisa indaba yomtjhado wesikhethu bonyana boke abatjhade ngendlela yesikhethu abawutlolise umtjhadwabo loyo wesikhethu ubesemthethweni.

EmBusweni weDemokhrasi umtjhado wesikhethu bowusemthethweni nanyana ungakatloliswa emNyangweni wezeKhaya,begodu umBuso uwuthathela phezulu. Ngaphambilini umuntu ubakhupha incwadi yokulobolo,kwesinye isikhathi nayingekho incwadi leyo kubizwe abofakazi mahlangothi womabili, lekhabo likababa nomma. Abofakazi ababilaba bafakaza bonyana mbala ababilaba batjhada ngokwesikhethu.

Kuthe ngokungena kwakaNgqongqotjhe umhlonitjhwa uKubayi waletha ihlelo elitjha lokukhuthaza bonyana kutloliswe umtjhado wesikhethu. Njenganje umNyango lo, umemezele bonyana woke umuntu otjhade umtjhado wesikhethu eSewula Afrika akakhambe ayowutlolisa emNyangweni wezeKhaya njengomtjhado osemthethweni.

Ngokutjho komNyango lo,lokho kuzokwenza kubelula bonyana umtjhado loyo uthatheke njengomtjhado ophilako nokhona nowaziwako. Lokhu umBuso ukwenzela izinto zibelula nanyana kufika isikhathi sobudisi,la omunye akhunjulwa khona nguZimu. Kuzobalula indlela yokwaba ipahla kilaba abatjhadileko ngaphandle kombango nanyana itjhada.

Umhlaka 31 kuRhoboyi 2026 ngoMvulo wakusasa lilanga lokuvalwa kokutloliswa kwalabo abatjhada ngesikhethu. Nange umuntu lifike beladlula ilangeli kutjho khona bonyana umtjhadwakhe awukho emthethweni ngombana khenge awutlolise nomNyango wezeKhaya.

Ithuba elitjha lokutlolisa umtjhado wesikhethu lizakunikelwa labo abatjhade mhlapha,ngombana kuzabe sekuyikambiso ejayelekileko bonyana umtjhado nomtjhado uyatloliswa,ngaphandle kobana kubekhona elinye godu ihlelo lomBuso lokuvikela labo abatjhada kade kodwana babhalelwa kutlolisa umtjhadwabo ngezizathu ezithileko.

/////////////////////////////////////////////////////////////////////////////////////////////////////////////////////////