UMphathi Wesikolo Akafuni Ukwamukela Umfundi Ngemva Kokuphetha Isiko Lakhe LesiNdebele
MKHOZI
Mkhozi Namba Skhambe NgoSondo Mhlaka 16 KuRhoboyi 2026
Cosmo City-UMphathi wesikolo i-Cosmo City Secondary School eCosmo City esiFundeni seGauteng akafuni ukwamukela umfundi wesikolo sakhe obekafunda khonapho kuye. Lokhu kuvezwe ngumma otshwenyekileko nombelethi wesokana elitjha njengombana ikosi beyithabile nje. Umma lo uthi incwadi yanikelwa isikolo bonyana umswa lo ukhamba nini begodu ubuya nini,kodwana okurarako uMphathi wesikolwesi akafuni ukumamukela.
Okubuya kurare umma lo yindaba yokuthi umswa lo namkha isokana lakwakhe libuye ngaphambi kwesikhathi esibekiweko ukubuyela esikolweni,kodwana uMphathi wesikolo akayingeni leyo. Ababiki beendaba bakwa-SABC khebavakatjhela isikolwesi kodwana uMphathi khenge afune nokubabona wababizela abogada bonyana baphume baphele emaqabazini wesikolo sakhe.
Isokana elitjheli libalelwa eminyakeni elitjhumi nesithandathu,begodu ngokutjho komndeni lithathwe layiswa KwaDlawulale esiFundeni seLimpopo kwaSithole la liphumele khona ukuyokuthatha ibizo lalo lobusokana. Indaba le ibonisa ingekhe yaphela msinyana njengombana kuhlongozwa ukubonana nomNyango wezeFundo esiFundeni seGauteng kunye nobukhosi obungaphasi kwesiFunda seGauteng.
Kuyavela bonyana unina utshwenyeke khulu ngoMphathi wesikolo ongafuni ukwamukela isokana lakwakhe esikolwenesi la belivele lifunda khona. Umma lo uthi unesigandeleli ngebanga lokwaliwa komntwanakhe esikolwenesi. “Incwadi yathunyelwa esikolweni kwavezwa bonyana uzokubuya nini,bewabuya ngaphambi kwesikhathi”,kutjho unina lomfundi.
Mbala kubonakele bonyana wabuya ngaphambi kwesikhathi esasibekiwe bonyana uzakubuya ngaso kodwana isikolo sibhala ukumamukela. UMkhozi nakahlanganisa umbiko lo isokana belingakabuyeli esikolweni,bekubonakala bonyana indaba le iyakude ngekhe isiphelele nje emmoyeni.
////////////////////////////////////////////////////////////////////////////////////////////////////////////////////////