UMengameli We-Zimbabwe Ungezelelwe Isikhathi Bekufike Umnyaka Ka-2030
MKHOZI
…….Namba Skhambe…….
Mkhozi NgoMgqibelo Mhlaka 11 kuVelabahlinze 2026
Isithombe se-Instagram: UMengameli weZimbabwe umhlonitjhwa u-Emmerson Mnangagwa iPhalamende yeZimbabwe imngezelele isikhathi sokubusa ngeminyaka emibili ukusukela ngomnyaka ka-2028 bekufike umnyaka ka-2030.
Zimbabwe: IPhalamende yenarha yeZimbabwe iphumelelise yabe yadlulisa umthetho ngongelethu malunga we-ZANU PF la bathi khona uMengameli weZimbabwe u-Emmerson Mnangagwa uyokuhlala esitulweni sobuNgameli bekufike umnyaka ka-2030. Ngokomthetho inarha yeZimbabwe ngomnyaka ka-2028 bekufanele bonyana ibambe amakhetho wenarha yoke.
Kuyavela bonyana isiqhema se-ZANU-PF sithi uMengameli u-Emmerson Mnangagwa kunengi ekusafanele akwenze enarheni yeZimbabwe angakakwenzi ngebanga lokutlhayelelwa sikhathi. Lokho sekutjho bonyana amaZimbabwe ngekhe asaya emakhethweni womnyaka ka-2028, njengombana izinto zitjhugulukile nje, ngebanga lokuphumelelisa komthetho bonyana uMengameli akaragele phambili bekufike umnyaka ka-2030.
Isenzo esinjengalesi sense bonyana iinhlangano zepolotiki eziphikisako enarheni yeZimbabwe zingakuthabeli koke lokhu okwenzakalako, njengombana ziveza bonyana indaba le bayoyifaka eKhotho eKulu yeZimbabwe. Neenhlangano ezingakhambisani ne-ZANU PF nazo zikhuze zababaza umhlolo bonyana yini le eziyizwako ngoMengameli ongezelelwe isikhathi sokubusa namkha sokuhlala esitulweni njengombana inarha yeZimbabwe isafana nalokha kusaphethe uMugabe.
Eenkundleni zokuthintana uMengameli Emmerson Mnangagwa ubonakale athabile begodu akhuthaza amaZimbabwe aphuma eSewula Afrika abuyela ekhabo eZimbabwe,uthi uMengameli weZimbabwe ababuye ekhaya begodu bayabasekela ngazo zoke iindlela. Phambilini uMengameli khona eenkundleni zokuthintana waveza tjhatjhalazi bonyana njengombana kuqothwa amaphandle eSewula nje, amaZimbabwe wona nakabuyela eZimbabwe aqalene nokubotjhwa ngemilandu emibili; wokuthoma kungena eSewula Afrika ngaphandle kwemvumo, wesibili kuphuma eZimbabwe ngaphandle kwemvumo ubuye ngaphandle kwemvumo.
Inengi lamaZimbabwe elihlala enarheni yeSewula Afrika liviza bonyana inarha yezimbabwe ayikho into etja elizoyenza ukutjhugulula ipilo yamaZimbabwe abuyelekhaya. Bayaqiniseka bonyana lokhu akukhulumako uMengameli weZimbabwe kulahlwa abantu nje kubonakale kwanga uyasebenza, begodu kube kwanga kukhona abazokwenza ngamaZimbabwe abuyelekhaya kanti ayikho into enjalo. Umthombo weendaba; ENCA NEWS
////////////////////////////////////////////////////////////////////////////////////////////////////////////////////////
MKHOZI
