Ihlangano ye-Service Delivery Party Nomphakathi Barhwante Batjhinga KwaMaspalati WeThembisile Ngebanga Lamaphandle Nokhunye
MKHOZI
NgeLesithathu mhlaka 30 kuKhukhulamungu 2026
Kwaggafontein: Umphakathi weThembisile Hani Local Municipality uvukwe madlharuma watjhagala watjhinga kwaMaspalati uyokunghonghoyila ngamaphandle esele abonakala azele eentradini zakwaMaspalati lo eziseduze nesithabathaba seentolo la athengisa khona. Umtjhagalo lo bowusekelwa nayihlangano etja yezepolotiki i-Service Delivery Party.
Okhunye umphakathi olila ngakho yindaba yamanzi abonakala athontela,nezinga eliphezulu labantu abangasebenziko kiloMaspalati. Omunye wabarholi bomtjhagalo uthi abantu abatjha khese bayekele ukuthembela emrholweni wepentjheni yabantu abadala emndenini,akuvuleke imisebenzi bayokusebenza.
Umrholi wematjhi uThabo Mtshweni uthi babalelwa ku-50% abantu beThembisile abangasebenziko,begodu okhunye abalila ngakho yindaba yamanzi. “Umphakathi ulila ngamaphandle angenamvumo yokuba senarheni le ”,kutjho uShadrack Sepenyane omunye wabarholi bomtjhagalo.
Umtjhagalo lo unikele uMaspalati amalanga alitjhumi nekhomba bonyana aphendulule,ukusuka lapho uzakuthatha igadango elilandelako. Incwadi yeenghonghoyilo yamukelwe nguSodorobha weThembisile Hani Local Municipality umhlonitjhwa uLesetja Dikgale,avikelwe mapholisa.
///////////////////////////////////////////////////////////////////////////////////////////////////////////////////////////////////