MKHOZI

NgeLesihlanu mhlaka 25 kuKhukhulamungu 2026

IKhomitjhini eziJameleko yezamaKhetho ibize boke abongikhethani abazokungenela amakhetho kunye neenhlangano zepolotiki bonyana bazokutlikitla umgomo wokuzibophelela ekuziphatheni kuhle njengombana kubandamela amakhetho waboMaspalati enarheni zombelele mhlaka 04 kuNovemba 2026.

USihlalo weKhomitjhini ye-IEC uNomzana Mosotho Moepya nakakhuluma nabosopolotiki nabeendaba uthe into ekufanele yenziwe kulwisana nelwazi elimamala, njengombana kubandamela amakhetho nje. Ukhulume lokhu ngeLesithathu seveke le,amalanga amatjhumi amabili nantathu kuKhukhulamungu kiwo umnyaka lo.

UNomzana Moepya uthi iKhomitjhini yenze koke okusemandlenayo ukufundisa ngamakhetho emirhatjhweni neendaweni zoke zikamabonwakude neenkundleni zoke zokuthintana. “Thina njengeKhomitjhini le yakwa-IEC siyaqiniseka bonyana koke esikwenzako kuzoba yinto esiyiveza tjhatjhalazi ngaphandle kwefihlo”,kutjho uSihlalo weKhomitjhini eziJameleko yezamaKhetho uNomzana Mosotho Moepya.

Ngokuya kweKhomitjhini le boke abongikhethani abazijameleko neenhlangano zepolotiki, ukusukela ngelangelo lomhlaka 23 kuKhukhulamungu ukuya phambili zoke iinhlangano zepolotiki nabongikhethani kufanele batlikitle ukuzibophelela. La ekuzibopheleleni kukhulunywa ngokuziphatha kuhle kwabosopolotiki indlela abazikhangisa ngayo, kube yindlela elungileko kungabikhona iinhlangano ezithi kuneendawo la kungangenwa khona ngombana kukhonya zona.

Ukutlikitlwa komgomo wokuzibophelela ekuziphatheni kuhle kwabongikhethani kanye neenhlangano zepolotiki kufaka hlangana indaba yokusabisa abanye abosopolotiki namkha iinhlangano zepolotiki, neendawo la ekuthiwa alibhadwa khona. Kokugcina okhunye okukhulunywa ngakho yindaba yokuvowuda ngokukhululeka. Zitlikitlile ke iinhlangano zepolotiki ezinye zatlikitla eentetjhini zakwa-IEC ngokuhlukana kwazo enarheni zombelele neemFundeni zakhona.

////////////////////////////////////////////////////////////////////////////////////////////////////////////////////////