Iincwadi Zokutjhayela Sezizokuvuselelwa Njalo Ngemva Kweminyaka Elitjhumi Kwanjesi
MKHOZI
Mkhozi Namba Skhambe NgoSonto Mhlaka 2 KuRhoboyi 2026
Ngemva kwesikhathi eside abatjhayeli beenkoloyi balila ngokuthi ukuvuselela iincwadi zabo zokutjhayela njalo ngeminyaka emihlanu kubabeka ebujameni obudisi. Abatjhayeli banghonghoyila ngokubhadela bebapopolwe amehlo koke lokhu kudla isikhathi sabo.
Kungasikade koke lokho kuzabe kuyintolwani njengombana sekuneendaba ezimnandi zabatjhayeli beenkoloyi. IPhalamende yeSewula Afrika ivumile bonyana ukuvuselelwa kweencwadi zokutjhayela ngekhe kusaba minyaka emihlanu njengombana kusenzeka nje,kodwana sekuzakuthatha iminyaka elitjhumi kwanjesi.
Lokho kutjho bonyana abatjhayeli beemodoro ezincani bazakuvuselela iincwadi zabo zokutjhayela njalo ngemva kweminyaka elitjhumi kungasikade. Lokho kuzokwenzakala kungasikade,njengombana iPhalamende seyivumile nje bonyana akubenjalo. Iinkoloyi ezimhlobo weemodoro ezincani zeencwadi ze;code-08,A,A1,B ngizo ezizokuvunyelwa bonyana abanikazi bazo bavuselele iincwadi zabo zokutjhayela ngemva kweminyaka elitjhumi.
Iinkoloyi ezinjengeenlori, ukusukela ku-code 10,ukuyaphezulu amathraga nezinye iinkoloyi ezilayitjha umthwalo obudisi zona zisazokuvuselelwa njalo ngeminyaka emihlanu. Kunabantu abaveze umbono wokuthi ngathana sebafaka woke umhlobo weenkoloyi,ngombana iminyaka le emihlanu abadosemhlweni ngayo iseduze khulu.
“ Abantu ngekhe basajama iimjejemide ilanga loke,begodu ngekhe kusabanekohlakalo “,kutjho uNgqongqotjhe wezenThuthi uBarbara Creecy,emNyangweni omkhulu kaRhulumende. Inengi labantu libonakale lithabela isimemezelo esinjengalesi,bebatjho bonyana nezinyee iinkoloyi zizakulandela.
////////////////////////////////////////////////////////////////////////////////////////////////////////////////////////