MKHOZI

NgeLesihlanu mhlaka 22 kuSewula 2026

Umbiko ngu-Vusi Gama

Witbank-Kubanjwe isifundobandulo eWitbank ngaphasi kwakaMaspalati weMalahleni mhlapha nje, ngesiFundeni seMpumalanga. Umnqopho wesifundobandulo bekukucobelela ilwazi kilabo ababavumi esiFundeni seMpumalanga khulu khulu ngesiphandeni seNkangala.

Kuyavela bonyana abavumi abanengi nabasakhasako abakatlolisi iingoma zabo. Yeke ke, ihlangano esebenza ngobukghwari i-Independnent Music Performance Rights Association(IMPRA) beyilapho ukupha ilwazi ngokutloliswa kweengoma bonyana zibe semthethweni,begodu ngiyo ihlangano le ebeyitjhayela isifundobandulwesi. Ngaphakathi kilesifundobandulo bekukhona nomrhatjho Ikwekwezi Fm yakwa-SABC, nayo ekhulume ngokufaka iingoma kilomrhatjho.

UNomzana Zweli Mdaka we-IMPRA ukhuthaze abavumi bonyana kuqakathekile ukutlolisa ingoma enye nenye evunywako. Lokho kwenzelwa ukubhadelwa ngomsebenzi waleyongoma evunywako. Nakaragela phambili uNomzana Zweli Mdaka uthi, abavumi abakuthathele phezulu ukutloliswa kweengoma zabo khona bazokuthola imbadelo ngomsebenzi wabo.

Kuyavela bonyana abavumi abanengi ababhadelwa,ngebanga lokuthi iingoma zabo azikatloliswa erhelweni lokutloliswa kweengoma zabavumi. Ihlangano le i-IMPRA ihlose ukuyelelisa abavumi bonyana bayelele bangadlelezelwa ngeengoma zabo. Khonapho Ikwekwezi Fm,kula ingene khona yahlathulula bonyana abavumi kufanele benzenjani nakufanele iingoma zabo zidlalwe emrhatjhweni. Umrhatjho bewabawa bonyana abavumi khese batlame iingoma ezimnandi neengoma ezinomlayezo khona zizokufakwa bezidlalwe kilomrhatjho.

Kuzwakele la abavumi nabo bavela ngeentjhijilo zabo abahlangabezana nazo. Nomlayezo wokutloliswa kweengoma wezwakala,nendima edlalwa yi-IMPRA ekorweni yezomvumo namkha ubukghwari. UNomzana Vusi Gama ojamele i-Cultural Creative Industry Federation of South Africa naye bekakhona hlangana nabavumi kiso isifundobandulwesi./////////////////////////////////////////////////////////////////////////////////////////////////////////////////////