MKHOZI

NgeLesihlanu Mhlaka 16 kuSewula 2026

Kempton Park- Ihlangano yeenyunyana i-Congress of South African Trade Union (COSATU) ibuya emakhethweni ukusukela ngeLesibili nangeLesithathu kiyo leveke esikiyo. Kubuywa emakhethweni nje,uMengameli omutjha nokhethwe ngelethu lelo kube nguNomzana Mike Shingange. UShingange ukhuphe uZungiswa Losi obekangamele isitulwesi iminyaka emine.

Umma uZungiswa Losi ukhethwe ukuba nguNobhala-Zombelele we-COSATU. ISekela likaMengameli lokuthoma ngumma uSusan Khumalo,iSekela likaMengameli lesibili kwaba ngumma uMbali Blose. ISekela likaNobhala-Zombelele kwaba nguNomzana Gerald Thwala. Kokugcina uMphathi weemali kwakhethwa umma uKgomotso Makhupola.

UNomzana Solly Phetoe ulahlekelwe sikhundla sokubanguNobhala-Zombelele nakakhutjhwa esikhundleni nguZungiswa Losi. Ngakwelinye ihlangothi kwayena Zungiswa Losi, ulahlekelwe sihlalo sokungamela i-COSATU la akhutjhwe khona nguMike Shingane. Laba baphathi abayokuphatha iminyaka emine,ngemva kwalapho kuzaba namanye amakhetho godu.

Ngelanga lokuthoma khekwaba khona ukuphikisana nokurhitjhana ngamagama,ngebanga lokutjhugulula nokutjharaganisa ikambiso yesikhozi sabathathu. Ngokujayelekileko, la esikhozini sabathathu kuba yi-African National Congresss(ANC) evalako ngekulumo. Kuthoma ngehlangano yomphakathi i-South African National Civic Organisation (SANCO)kulandele i-South African Communist Party (SACP) bese kuvala nge-African National Congress.

Yeke ke,okwenzakale la kuvela bonyana i-COSATU ihlele bonyana kube yi-ANC evulako. UNomzana Gwede Mantashe kuthiwa ngikho okumenze bonyana anghale bowaphuma wakhamba phakathi komhlangano. Kunezwa ngobatjho ethi bazamile ukumncenga abanjengo Solly Phetoe kanye noSnuki Zikalala kodwana kwabhala. Ngokuya kwaka Nomzana uMantashe lokhu okwenzakele kilomhlangano khenge khekwenzeke kwakade.  “Asikwazi ukulahla ikambiso yethu yendlela esiraga ngayo izinto la esikhozini sabathathu. Akhenge khekwenzeke bonyana i-ANC kube ngiyo evula ngekulumo kodwana kuba yi-ANC evalako”,kutjho usiHlalo we-ANC unomzana Gwede Mantashe nakatjela beendaba.

Ngakwelinye ihlangothi uMengameli omutjha we-COSATU uNomzana Mike Shingange ukhulume ngokuthi bona njenge COSATU la kukhona imbizo ye-ANC namkha ye-SACP bazabe balapho. “Thina njenge-COSATU ngekhe sizizwe kumbi ngokukhambela imbizo ye-ANC namkha ye-SACP ngombana kuyindlela esithethe ngayo isiqunto sethu sokuqinisa ubudlelwano bethu nesikhozi sabathathu ”,kutjho uMengameli omutjha uNomzana Mike Shingange we-COSATU.

////////////////////////////////////////////////////////////////////////////////////////////////////////////////////////