USodorobha WeNkangala District Municipality Uhlangene Namakhosi WeNkangala
MKHOZI
Mkhozi Namba Skhambe NgoMgqibelo Mhlaka 15 KuRhoboyi 2026
KwaMhlanga-USodorobha weNkangala District Municipality ikhansela elingumhlonitjhwa uThomas Ngwenya uhlangene namakhosi bahlanganela ePhalamende yaKwaMhlanga izolo ngeLesihlanu. Kilomhlangano uSodorobha bekathula umbiko obuyako emakhosini.
Ngokuya kwakaSodorobha uNgwenya, aboMaspalati nobukhosi kufanele kusebenzisane. La uSodorobha ubahlathulela amakhosi ngomsebenzi kaMaspalati wesiphande seNkangala bonyana selakhambe kangangani bekube khathesi. Okhunye akuvezileko uSodorobha ngilokhu okulandelako;
- Ukuletha izenzelwa emphakathini.
- Ukuletha amanzi ahlwengekileko emphakathini.
- Ukulungisa iindlela zomphakathi.
- Ukudala amathuba wemisebenzi esiphandeni seNkangala.
Ngokuya kwakaSodorobha, koke lokhu kuthoma kiboMaspalati beendawo phasapha,kukhuphuke bekufike kiboMaspalati besiphande. Ngokuya kwakaSodorobha ikhansela uNgwenya uthi kulapho kufuneka khona ubudlelwano phakathi kwakaMaspalati nobukhosi. USodorobha uthi akungabi nabantu abathatha iindawo ngekanni ngombana yoke indawo ifuna bonyana ihlolwe nguMaspalati, khona kuzoba namanzi negezi kulapho ke ubukhosi bungena khona.
Ikosi undabezitha uMathopa Mokoena we-CONTRALESA bekakhona. Undabezitha uMokoena uthi uyarareka yena ukubona aboMaspalati baya emihlanganweni ephethe amahlelo womphakathi, kodwana amakhosi akabizwa kungiwo asebenza ngomphakathi.
“Akutlhogakali bonyana uMaspalati abenamahlelo womphakathi ngaphandle kokubiza ubukhosi baleyondawo,ngombana yikosi eyazi ngomphakathi”,kutjho undabezitha uMathopa Mokoena we-CONTRALESA. Ngakwelinye ihlangothi uSodorobha naye ubeke kwezwakala nakathi aboMaspalati abasebenzisane namakhosi khona kuzokuqalwa laba abathatha iindawo ngekani.
////////////////////////////////////////////////////////////////////////////////////////////////////////////////////////